મેરાન્યૂઝ નેટવર્ક.અમદાવાદઃ સતલાસણા તાલુકાના મોટા કોઠાસણાના એક અનુ. જાતીના યુવકે ટીકટોક વીડિયો બનાવતા મુછો પર તાવ આપી વીડિયો મુક્યો તો ગામના જ 7 શખ્સો આ વાતથી નારાજ થયા. પોતાને કહેવાતી ઉચ્ચ જાતીના સમજતા આ શેખી બાજોએ યુવકની મુછ કઢાવીને તને માર માર્યો અને તેનો વીડિયો પણ બનાવ્યો હોવાની ફરિયાદ સતલાસણા પોલીસે નોંધી છે. પોલીસે આ 7 શખ્સોની હલકી માનસીકતા વાળી કરતુંતોને કારણે બે જાતીઓ વચ્ચે કોઈ અણબનાવ ન બને તેવા હેતુથી ગામમાં કડક બંદોબસ્ત ગોઠવી દીધો છે.

બાબત એવી છે કે મોટા કોઠાસણા ગામના એક સંજય પરમાર નામના યુવકે ટીકટોક પર એક વીડિયો અપલોડ કર્યો હતો. જેમાં તેણે મુછોને તાવ આપતો વીડિયો મુક્યો હતો, બેક્ગ્રાઉન્ડમાં રાણા તો ફરવાના ગીત મુક્યું હતું. જોકે યુવકની આ સ્ટાઈલ ગામના જ કેટલાક લોકોને નડી હતી. જેને લઈ ગામના ચૌહાણ સંજયસિંહ જેઠુસિંહ, ચૌહાણ સંગ્રામસિંહ પ્રહલાદસિંહ, ચૌહાણ રાજદીપસિંહ ચકુસિંહ, જયદીપસિંહ વેલસિંહ, રાજપાલસિંહ અર્જુનસિંહ અને સવરાજસિંહ જગતસિંહ તેમજ એક અજાણ્યો શખ્સ સહિત સાત શખ્સોએ યુવકને ગડદાપાટુનો માર માર્યો અને તેની મુછો પણ કઢાવી નંખાવી. આ ઉપરાંત શખ્સોએ તેનો વીડિયો પણ ઉતાર્યો હતો. મામલાને લઈને આખરે યુવકે પોલીસ ફરિયાદ કરતાં પોલીસે આ તમામ સામે રાયોટિંગ, મારામારી, એટ્રોસીટી અને આઈટી એક્ટ સહિતના ગુના નોંધ્યા છે. પીડિત યુવકના પિતાનો મોબાઈલ વીડિયો મેસેજ પણ ફરતો કરાયો છે જેમાં યુવકના પિતા પોલીસ દ્વારા ફરિયાદ નોંધી સંપુર્ણ સહયોગ અપાયો હોવાનું જણાવી રહ્યા છે. ઉલ્લેખનીય છે કે છેલ્લા કેટલાક વખતોથી કેટલીક જ્ઞાતિઓ વચ્ચે વરઘોડા, ઘોડા, મુછો, વગેરે બાબતોને લઈને કેટલીક સામાજીક દુઃખદ ઘટનાઓ સામે આવી છે.