મેરાન્યૂઝ નેટવર્ક.મુંબઇ:  મુંબઇના ચેમ્બુરમાં ભારે વરસાદને કારણે એક દર્દનાક અકસ્માત સર્જાયો છે. ભૂસ્ખલનના બે અલગ અલગ બનાવોમાં 15 લોકોએ જીવ ગુમાવ્યો છે. ચેમ્બુરમાં ભારે વરસાદને કારણે ભૂસ્ખલનમાં અનેક મકાનો ધરાશાયી થયા હતા. ઘરના કાટમાળ નીચે દબાયેલા 12 લોકોના મોત. તે જ સમયે, વિક્રોલીમાં ભૂસ્ખલનમાં ચાર લોકોએ જીવ ગુમાવ્યો છે. બંને અકસ્માતમાં ઘણા લોકો ઘાયલ થવાની પણ આશંકા છે. અધિકારીઓએ જણાવ્યું હતું કે ઘટનાસ્થળે બચાવ અને રાહત કામગીરી હજી ચાલુ છે. અકસ્માત બાદ બચાવ ટીમે ઘણા લોકોને સલામત સ્થળો પર ખસેડ્યા છે.

મોડી રાત્રે અને આજે વહેલી સવારે કેટલાક કલાકોના વરસાદ બાદ ભૂસ્ખલનની ઘટનાથી વિક્રોલી અને ચેમ્બુર સહિત મુંબઇના લગભગ તમામ વિસ્તારો સ્તબ્ધ થઈ ગયા છે. શહેરમાં રેડ એલર્ટ જારી કરવામાં આવ્યું છે અને લોકોને ખુલ્લામાં ન આવવાની સલાહ આપવામાં આવી છે.

અધિકારીઓએ જણાવ્યું હતું કે પંદર લોકોને ચેમ્બુરના ભરત નગર વિસ્તારમાંથી અને નવ લોકોને વિક્રોલીના સૂર્ય નગરમાંથી  બચાવવામાં આવ્યા છે. તેમણે કહ્યું કે ઘાયલોને તબીબી સારવાર માટે નજીકની હોસ્પિટલમાં દાખલ કરવામાં આવ્યા છે. આ બંને વિસ્તારોમાં હજી બચાવ કામગીરી ચાલુ છે. અધિકારીઓએ જણાવ્યું હતું કે કાટમાળ નીચે વધુ લોકો ફસાયેલા હોવાની આશંકા છે.

Advertisement


 

 

 

 

 

મુશળધાર વરસાદને પગલે ચૂનાભટ્ટી, સાયન, દાદર અને ગાંધી માર્કેટ, ચેમ્બુર અને કુર્લા એલબીએસ રોડના નીચાણવાળા વિસ્તારોમાં પૂર જેવી પરિસ્થિતિ બનેલી છે . સમાચાર એજન્સી એએનઆઈ દ્વારા જારી કરાયેલા એક વીડિયોમાં બોરીવલી પૂર્વ વિસ્તારમાં કારો ને પાણીમાં વહેતી બતાવવામાં આવી છે. અધિકારીઓએ જણાવ્યું હતું કે મુંબઈ શહેરમાં રાત્રે 8 વાગ્યાથી 2 વાગ્યા દરમિયાન 156.94 મીમી વરસાદ નોંધાયો છે.