મેરાન્યૂઝ નેટવર્ક.અરવલ્લીઃ અરવલ્લી જીલ્લામાં અકસ્માતની ઘટનોમાં સતત નોંધપાત્ર વધારો થવાની સાથે નિર્દોષ વાહન ચાલકો અને રાહદારીઓ અકસ્માતમાં અકાળે મોતને ભેટી રહ્યા છે. અરવલ્લી જીલ્લામાં બે હિટ એન્ડ રનની ઘટનામાં બે લોકોના મોત નિપજતા અને અન્ય કાર ચાલકે સ્ટિયરિંગ પરથી કાબુ ગુમાવતા ડમ્પર સાથે ભટકતા કારમાં સવાર એક વ્યક્તિનું ઘટનાસ્થળે મોત નીપજ્યું હતું ૬ કલાકના સમયગાળામાં ૪ અકસ્માતમાં ૩ લોકોના મોત નિપજતા ભારે હાહાકાર મચ્યો હતો ૪ લોકોના શરીરે ગંભીર ઈજાઓ પહોંચતા તાબડતોડ સારવાર અર્થે દવાખાને ખસેડ્યા હતા.

ધનસુરા તાલુકાના વડગામ નજીક મારુતિ ઓમ્ની કારના ચાલકે સ્ટિયરિંગ પરથી કાબુ ગુમાવતા રોડ પર ઉભેલી ગાયને ટક્કર મારી સામેથી આવતી આઈવા ડમ્પર સાથે ભટકતા વાનનો કડૂચાલો બોલાઈ ગયો હતો. ઓમ્ની કારમાં બેઠેલા અને મોડાસા શહેરની શાહેઆલમ સોસાયટીમાં રહેતા અલ્તાફ હુસેન અબ્બાસમીયા મલેક (ઉં.વર્ષ-૫૪) ના શરીરે ગંભીર ઈજાઓ પહોંચતા ઘટનાસ્થળે મોત નીપજ્યું હતું. કાર ચાલક શાહિદ અહેમદભાઈ કુશ્કીવાલા ના શરીરે ઈજાઓ પહોંચતા સારવાર અર્થે દવાખાને ખસેડાયો હતો. અન્ય એક અકસ્માત ધનસુરાની નવી શિણોલ ગામ પાસે બન્યો હતો. જેમાં મોડાસાના બલોચવાડા માં રહેતો મોં. ઝુબેર સિદ્દીકભાઈ બેલીમ તેની બાઈક લઈને કામકાજ અર્થે પસાર થતા અજાણ્યા વાહન ચાલકે ટક્કર મારતા બાઈક ચાલક મોં. ઝુબેર રોડ પર પટકાતા માથાના ભાગે ઈજાગ્રસ્ત થતા અકસ્માતના પગલે દોડી આવેલા લોકોએ ૧૦૮ ઇમરજન્સી એમ્બ્યુલન્સ મારફતે સારવાર અર્થે ખસેડતા રસ્તામાં જ દમ તોડી દીધો હતો. મોડાસા શહેરના લઘુમતી સમાજના બે વ્યક્તિઓનું અકસ્માતમાં મોત નિપજતા મુસ્લિમ સમાજમાં શોકનું મોજું ફરી વળ્યું હતું. ધનસુરા પોલીસે બંને મૃતકની લાશને પીએમ અર્થે ખસેડી કાયદેસરની કાર્યવાહી હાથધરી હતી.

માલપુર-મોડાસા રોડ પર આવેલા માલજીના પહાડીયા નજીક હિટ એન્ડ રનની ઘટના બનતા સરકારી જીપે રાહદારીને અડફેટે લેતા ઘટનાસ્થળે કમકમાટી ભર્યું મોત નિપજતા સરકારી જીપનો ચાલક જીપ ઘટનાસ્થળે મૂકી રફુચક્કર થઈ ગયો હતો. માલજીના પહાડીયા નજીક રોડ ક્રોસ કરતા સંજીવકુમાર રામકુમાર મિસ્ત્રી (રાનામુઉ , ઉત્તરપ્રદેશ) ને ગવર્મેન્ટ ઓફ ગુજરાત લખેલી ટાટા ગોલ્ડ જીપ (ગાડી. નં. GJ .18 .GA 1342 ) ના ચાલકે ટક્કર મારતા સંજીવ કુમાર ના શરીરે ગંભીર ઈજાઓ પહોંચતા ઘટનાસ્થળે કમકમાટી ભર્યું મોત નીપજ્યું હતું અકસ્માતના પગલે દોડી આવેલી માલપુર પોલીસે મૃતકની લાશને પીએમ માટે ખસેડી કાયદેસરની કાર્યવાહી હાથધરી હતી.