મેરાન્યૂઝ નેટવર્ક.અમદાવાદઃ અમદાવાદના વસ્ત્રાલમાં રહેતા પંચાલ પરિવાર માટે આ અઠવાડિયે આવેલું પાર્સલ આશ્ચર્ય લઈને આવ્યું. આ પાર્સલ 2016માં ગુમ થયેલા તેમના દિકરા રોનક તરફથી આવ્યું હતું. જોકે રોનક અગાઉ પણ એક વખત ઘર છોડીને જતો રહ્યો હતો. અગાઉ 2012માં ગાયબ થયા બાદ તે ફરીથી જોવા મળ્યો હતો. 2012માં રોનક જતો રહ્યો તે પછી પરિવારે ત્રણ વર્ષ સુધી તેને શોધવા માટે મરણિયા પ્રયાસ કર્યા હતા. પરિવારે આશા છોડી દીધી ત્યારે મે 2015માં અચાનક જ રોનકે પિતા નરેન્દ્ર પંચાલને ફોન કર્યો હતો અને પોતે શહેરમાં પરત આવી ગયો હોવાનું જણાવ્યું હતું.

જો કે, રોનક પાછો આવી જતા પરિવાર ખુશ હતો પરંતુ તેનામાં થોડું પરિવર્તન આવ્યું હતું. રોનક 12 વર્ષનો હતો ત્યારે ઘર છોડીને જતો રહ્યો હતો. તે પ્રાદેશિક ઉચ્ચારણમાં હિન્દી બોલતો હતો. હવે તે ગલીના છેલબટાઉ છોકરા જેવો થઈ ગયો હતો અને બીડી ફૂંકવા લાગ્યો હતો. રોનકના ઘરે આવ્યા પછી પરિવારમાં જે ખુશી હતી તે લાંબી ના ટકી અને માર્ચ 2016માં તે ફરીથી ઘરેથી જતો રહ્યો. એટલું જ નહીં પરિવાર સાથેના બધા જ સંબંધો કાપી નાખ્યા હતા. પિતા નરેન્દ્ર પંચાલે જણાવ્યું હતું કે, એટલે જ તેના તરફથી આ પાર્સલ આવતા અમે ઉત્સાહિત અને શંકાશીલ છીએ.

વસ્ત્રાલમાં એક ફેબ્રિકેશન યુનિટના ભાગીદાર નરેન્દ્ર પંચાલે જણાવ્યું, બોક્સમાં રોનક તરફથી કોઈ પત્ર નથી. બોક્સમાં તેના કપડાં, ચોપડીઓ, નોટબુકો અને દેખીતી રીતે તેણે જીતેલા મેડલ અને મોમેન્ટો છે. અમદાવાદમાં આવેલા NGO સર્ચ માય ચાઈલ્ડના ફાઉન્ડર સંજય જોષીએ કહ્યું કે, પરિવારે પાર્સલ જ્યાંથી મોકલાયું હતું ત્યાં મહેસાણાની કુરિયર ફર્મમાં સંપર્ક કર્યો હતો. જ્યારે અમે ફર્મ માલિકને અમારી આખી બાબત સંભળાવી ત્યારે તેમણે અમને આધારકાર્ડની કોપી આપી. તસવીર ચોક્કસથી રોનકની જ હતી પરંતુ તેણે નામ બદલીને સૂર્યા કરી નાખ્યું હતું.

સંજય જોષીનું કહેવું છે કે, આધારકાર્ડમાં લખેલું એડ્રેસ રાજસ્થાનની ઝાલાવાડમાં આવેલા સંકલ્પ બાલ ગૃહનું હતું. અહીં બાળકો માટે સ્કૂલ પણ છે. રોનકને શોધવાની કડી મળતા પરિવારને આશાનું કિરણ મળ્યું હતું. જો કે, જ્યારે પંચાલ પરિવાર અને સંજય જોષીએ સ્કૂલનો સંપર્ક કર્યો તો તેઓ નાસીપાસ થઈ ગયા. સંજય જોષીએ કહ્યું, સ્કૂલ તરફથી અમને જણાવ્યું કે, રોનક ઓક્ટોબર મહિનામાં જ ત્યાંથી ભાગી ગયો હતો. 2016માં સબ-ડિવિઝનલ મેજિસ્ટ્રેટે તેને માઉન્ટ આબુ ખાતે એક દુકાનમાં જોયો ત્યારે તેને સ્કૂલમાં પાછો લાવ્યા હતા, પરંતુ થોડા જ દિવસમાં તે મુંબઈ ભાગી ગયો.

રોનકના મેડલ જોઈને પરિવારને વિશ્વાસ થયો કે હજુ પણ તે પહેલાની જેમ હોંશિયાર જ છે. નરેન્દ્ર પંચાલે કહ્યું, તેણે પોતાનો સામાન ઘરે મોકલાવ્યો છે ત્યારે અમને આશા છે કે તે એક દિવસ ચોક્કસ પાછો આવશે. અમને ખબર છે કે, તેનું મન બીજે ક્યાંય લાગ્યું છે પરંતુ તે સાજો છે તેની જાણ થયા પછી મનમાં હાશકારો છે.

મહત્વનું છે કે, 23 ફેબ્રુઆરી 2012ના રોજ રોનક ઘરેથી સાઈકલ ચલાવવાનું કહીને ઘરેથી નીકળ્યો હતો અને તે પછી ગાયબ થઈ ગયો હતો. રોનક ગયો એ દિવસે ઘરેથી 500 રૂપિયા પણ લઈને ગયો હતો. 15 મે 2015ના રોજ રોનક પિતાને ફોન કરીને શહેરમાં આવી ગયો હોવાનું કહ્યું હતું. તેણે દાવો કર્યો હતો કે, એક વ્યક્તિ ચોકલેટની લાલચ આપીને તેને ઉપાડી ગયો હતો. ત્યારબાદ તેણે એક ખાણીપીણીની દુકાનમાં કામ કરીને ગુજરાન ચલાવ્યું હોવાનું જણાવ્યું હતું. 17 માર્ચ 2016માં રોનક ધોરણ 10માં હતો, ત્યારે તે ઘર છોડીને નાસી ગયો હતો. તેના માતા-પિતા સામાજિક પ્રસંગે ગયા હતા ત્યારે તકનો લાભ લઈને ભાગી ગયો હતો. જે પછી છેક હમણા તેનું પાર્સલ મળ્યું. પરિવાર આજે પણ તેને યાદ કરે છે અને તેના પરત આવવા પ્રાથનાઓ કરે છે.